Fundacion Parke Nacional Aruba a celebra siman di aprecio di ranger
| Date | August 01, 2023 |
| Author | |
| Categories | Corporate Updates |
| Share |
ORANJESTAD, ARUBA – 1 AUGUSTUS 2023 – Fundacion Parke Nacional Aruba (FPNA), un organisacion independiente encarga cu e conservacion y maneho di areanan terrestre y marino proteha na Aruba, ta anuncia cu e siman aki a conclui su celebracion di Siman di Aprecio di Ranger – un siman unda cu a gradici y honra e rangernan di FPNA pa e trabou cu nan ta eherce tur dia pa conserva naturalesa di Aruba.
Fundacion Parke Nacional Aruba ta encarga cu e proteccion di 24.2% di Aruba su area terrestre y 0.2% di Aruba su awanan teritorial y rangernan ta na vanguardia di conservacion di naturalesa den cada un di e areanan bou di maneho di FPNA.
Proteccion, preservacion y restauracion di naturalesa no ta un trabou facil y ta rekeri rangernan pa bisti diferente pechi diariamente. Algun di e pechinan aki ta inclui y no ta limita na traha pa monitor Aruba su biodiversidad rico y provee experiencianan transformational na bishitantenan di Parke Nacional Arikok pa asina bishitante nan local of di afo ta conciente di e trabou necesario pa conservacion di naturalesa.
Esaki ta sosode door di comparti informacion y duna educacion den forma di guia sea ora di cana of door di guia den e cueba di Fontein y cueba di Quadirikiri. Tambe rangernan ta duna educacion na muchanan di tur edad na diferente scolnan unda cu rangernan ta pasa algun ora ta siña muchanan mas di e importancia di conservacion di naturalesa, flora y fauna, geologia y tambe Aruba su herencia cultural.
Fuera di bishita scolnan, tambe rangernan ta ricibi grupo grandi di muchanan di scol of camp cu ta bishita areanan protehi bou maneho di FPNA y asina tin como meta pa inspira muchanan pa tambe bira protector di naturalesa di Aruba.
E trabou no ta caba eynan. Rangernan ta mantene rutanan pa bishitantenan por cana den naturalesa, nan ta recohe sushi den areanan protehi, nan ta maneha especienan invasivo manera e Boa cu ta un especie invasivo na Aruba y nan ta traha pa midi e salud di e systema ecologico di Aruba en general riba tera y den lama y asina hunto bin cu plannan di maneho pa conserva especienan nativo protehi cu ta den peliger di extension.
Pa duna gradicimento y pa mustra rangeranan e aprecio cu nan merece, e team di FPNA a organisa un siman cu diferente actividadnan en conexion cu Dia Mundial di Conservacion di Naturalesa y Dia Mundial di Ranger pa tur ranger. Esaki a cuminsa cu un caminata den naturalesa riba Dia Mundial di Conservacion di Naturalesa cu ta cai riba 28 di juli unda cu e team a cana e ruta di Sero Muskita, Sero Grandi y Sero Tres Cabes pa siña conoce otro areanan cu ta cai bou maneho di FPNA, fortifica e conocemento di rangernan y tambe trece empleadonan hunto pa un rato placetero. Den fin di siman, rangernan a bolbe topa otro pa un anochi di competencia di bowling y den dia a cool off di e calor di solo cu un treat di diferente sabornan local di ijscream di Keda Keto. Pa finalisa e siman, riba Dia Mundial di Ranger cu ta cai riba 31 di juli, rangernan a participa den un speurtocht den Oranjestad unda cu mester a completa diferente tareanan den grupo unda cu comunicacion, traha den team, duna instruccion y pensamento logico a hunga un rol grandi pa completa e tareanan den un forma exitoso y asina a sera e anochi cu un comemento.
Fundacion Parke Nacional Aruba kier gradici cada un ranger pa e trabou importante cu nan ta haci tur dia pa proteha, preserva y restaura naturalesa di Aruba pa futuro generecionan.
Pa mas informacion tocante e trabou di conservacion cu FPNA ta haci of pa book un guia cu un di e rangeranan di FPNA please tuma contacto via email na info@arubanationalpark.org.